DILI - Reprezentante povu nian iha Uma Fukun Paralemntu Nasional (PN) apresia ho tranformasaun Bank Payment Authority (BPA) ba Banku Central Timor-Leste (BCTL). Nee duni, membrus deputadus sira husu ba BCTL atu jere didiak osan estadu no povu Timor-Leste nian ho diak.
Prezidente Komisaun C PN, nebee trata asuntu ekonomia, finansas no anti korupsaun, Manuel Tilman, hateten, nia sentialegria tamba TL hanesan nasaun independente, iha ona banku central hodi jere osan estadu nian. “Hau nudar Prezidente Komisaun C senti alegria tamba Timor-Leste agora iha ona Banku Central Timor-Leste,” dehan Tilman ba STL iha edifisiu BCTL, Bairo Formosa hafaoin remata seremonia tranformasaun BPA ba BCTL, Tersa (13/9).
Iha parte seluk, Deputadu CNRT, Aderito Hugo da Costa, esplika, lei organika nebee Banku Central vigora ona liu husi diskusaun nebee naruk tebes ho responsabilidade, nen tau intensaun grupu interese partidu nian iha laran. Maibe hotu-hotu hamutuk hodi estabele Banku Central atu ema hotu respeita.
“Ohin, ita realiza liu husi lei organika nebee vigora ona. Importante tebes maka laiha bankadas opozisaun no bankadas governantes atu hatama nia kanuru tohar ho interese, maibe deputadu hot-hotu koopera hamutuk hodi estabelese BCTL,” dehan Hugo.
Nunee mos, Deputada Gertrudes Moniz husi Bankada PD espresa nia kontenti tamba TL desde ukun aan iha tinan 10 nia laran, konsege ona estabelese Banku Central ho situasaun nebee maka TL seidauk iha osan rasik. Maibe agora TL iha ona moeda, ida nee fesilidade povu TL tomak katak TL hetan ona susesu boot hodi hatudu soberania nasaun nee nian.
“Espera katak banku nee sai jestor nebee diak, liu-liu ba TL nia fundu petrolifeiru no mos banku nee sei rezolve ekonomia iha rai laran, liu-liu konaba inflasaun, atu nunee prezensa Banku Central nee bele regula inflasaun TL nian,” katak Gertrudes.
Garante Sustentabilidade Ekonomia
Husi parte governu nian, Vice Primeiru Ministru, Jose Luis Guterres, hateten, Timor-Leste agora garante ona ninia ekonomia sustentavel, tamba iha rasik ninia Banku Central. Needuni, serimonia transformasaun BPA ba BCTL nee nudar momentu ida importante tebes ba povu tomak.
“Hau dehan ba imi, katak ida nee eventu ida ke importante ba ita tomak, tamba ho banku central ita bele grantia liu ita nia indepedensia, in termus de politika monetaria, nomos ajuda ita nia ekonomiku sutentavel ba aban bainrua,” dehan Jose Luis Guterres ba jornalista sira.
Nia esplika, banku sentral mos iha responsabilidade atu jere fundu petroliferu. Needuni, nia hanoin katak Timor-oan hotu merese atu haksolok. Tamb ho eventu ida nee, aban bain rua sei grante indepedensia ekonomika no grante jestaun fundu petroliferu.
Jose Luis hatutan, governu ho laran ksolok, halo despaisu nomiasaun ba Abrão Vasconselhos hodi sai nudar Governador ba Banku Central TL nian.
Iha fatin hanesan, Jerolimo Sarmento, nudar partisipante hateten, “ami sente urgullu ho programa governu nian durante nee. Tamba governu hari tan banku central iha Nasaun TL. Agora TL mos bele ona uza ninia osan rasik, nunee mos ekonomia bele ona sustentavel”.
Maski nunee, nia mos husu ba governu ba oin, atu kria kampu trabalhu ba dezempregu sira, nunee povu TL bele moris hakmatek. jay/alm
Source: STL, 14 Setembru 2011
http://suara-timor-lorosae.com/home
